பாப்புலர் ஃப்ரண்ட் ஆஃப் இந்தியாவுக்கு ஜார்க்கண்ட் மாநில அரசு விதித்துள்ள தடையை நீக்குக! பொய் வழக்குகளைத் திரும்பப் பெறுக!
மதசார்பற்ற, இடதுசாரி, ஜனநாயக அரசியல் கட்சிகள் மற்றும் இயக்கங்கள், சமூக செயற்பாட்டாளர்கள் வேண்டுகோள்!

எஸ்.டி.பி.ஐ. கட்சி ஒருங்கிணைத்த இடதுசாரிகள் மற்றும் மதசார்பற்ற ஜனநாயக அரசியல் கட்சிகள், இயக்க தலைவர்களின் ஒருங்கிணைப்பு ஆலோசனைக்கூட்டம் சென்னை பத்திரிக்கையாளர் மன்றத்தில் இன்று(மார்ச்.02) நடைபெற்றது.

இந்த நிகழ்விற்கு எஸ்.டி.பி.ஐ. கட்சியின் மாநில தலைவர் கே.கே.எஸ்.எம்.தெஹ்லான் பாகவி தலைமை தாங்கினார்.

இக்கூட்டத்திற்கு பிறகு வெளியிடப்பட்ட கூட்டறிக்கையில் கூறியிருப்பதாவது;

பாப்புலர் ஃப்ரண்ட் ஆஃப் இந்தியா 2007ஆம் ஆண்டு தொடங்கி ஜனநாயகம், மதச் சார்பின்மை, சமூக நீதி ஆகிய இந்திய அரசமைப்பின் விழுமியங்களைப் போற்றி இந்தியாவின் பெரும்பாலான மாநிலங்களில் நாட்டின் சட்டதிட்டங்களுக்கு உட்பட்டு இயங்கி வருவதை அறிவோம். தமிழ்நாட்டிலும் அது தனித்தும் பிற ஜனநாயக அரசியல் இயக்கங்கள், கட்சிகளோடு இணைந்தும் அறப் போராட்டங்களிலும் ஆக்கப் பணிகளிலும் ஈடுபட்டு வருவதைக் கண்டுள்ளோம்.

இந்நிலையில் பாரதிய ஜனதாக் கட்சி தலைமையிலான ஜார்க்கண்டு மாநில அரசு திடீரென்று பாப்புலர் ஃப்ரண்ட் ஆஃப் இந்தியாவை அம்மாநில அளவில் தடை செய்திருப்பது அதிர்ச்சியும் கவலையும் தருகிறது.

1908ஆம் ஆண்டின் குற்றவியல் திருத்தச் சட்டம் பிரிவு 16இன் படி இத்தடையை விதிப்பதாக ஜார்க்கண்டு மாநில அரசு சென்ற பிப்ரவரி 20 நாளிட்ட தன் செய்திக் குறிப்பில் கூறியுள்ளது. தடைக்குத் தரப்பட்டுள்ள காரணம் தென் மாநிலங்கள் சிலவற்றில் ஐஎஸ்ஐஎஸ் பயங்கரவாத அமைப்பிற்குப் பாப்புலர் ஃப்ரண்ட் உறுப்பினர்களிடையே செல்வாக்கு ஏற்பட்டிருக்கிறது என்பதுதான் காரணம் என்று கூறப்பட்டுள்ளது. உண்மையில் ஐ.எஸ்.ஐ.எஸ் பயங்கரவாதத்தின் ஆபத்து குறித்துக் குறிப்பாக இஸ்லாமிய இளைஞர்களிடையே தொடர்ந்து விழிப்புணர்வு ஏற்படுத்தி வருவது பாப்புலர் ஃப்ரண்ட்தான். ஐ.எஸ்.ஐ எஸ்சுக்கு எதிராக பாப்புலர் ஃப்ரண்ட் சிறப்பானதொரு வெளியீடே கொண்டுவந்துள்ளது.

பாப்புலர் ஃப்ரண்டைத் தடை செய்ய எவ்விதக் காரணமும் இல்லை என்று கேரளம், கர்நாடகம் ஆகிய தென்மாநில அரசுகள் அண்மையில்தான் தெளிவாக அறிவித்துள்ளன. மேலும் அதனைத் தடை செய்யுமாறு இந்திய அரசுக்கு அறிக்கை ஏதும் அனுப்பவில்லை என்றும் இந்த மாநில அரசுகள் தெளிவாகத் தெரிவித்துள்ளன.

ஜார்க்கண்டு மாநிலத்தில் பாப்புலர் ஃப்ரண்டை ஒரு காலவழுச் சட்டத்தின் விதிகளைச் சொல்லித் தடை செய்திருப்பது உண்மைகளின் அடிப்படையிலோ சட்டத்தின் அடிப்படையிலோ நியாயப்படுத்த முடியாத நடவடிக்கை என்பதைச் சுட்டிக்காட்ட விழைகிறோம்.

அமைதியை நேசிப்பதும் சட்டப்படி இயங்குவதுமான ஓர் சமூக அரசியல் அமைப்பின் மீதான கிஞ்சிற்றும் தேவையற்ற இத்தடை சங்கம் சேரும் உரிமையையும், இந்திய அரசமைப்புச் சட்டத்தில் பொறிக்கப்பட்டுள்ள பிற அடிப்படை உரிமைகளையும் அப்பட்டமாக மீறுவதாகும் எனக் கருதுகிறோம். தலைமையமைச்சர் திரு.நரேந்திர மோடி தலைமையிலான இப்போதைய இந்துத்துவ அரசாட்சியில் அன்றாட வாடிக்கை ஆகி விட்ட சிறுபான்மையினர் மற்றும் அவர்தம் உரிமைகள் மீதான தொடர்ந்த கொடுந்தாக்கின் ஒரு கூறாகவே இத்தடையையும் கருதலாம்.

இந்தத் தடைக்கு உண்மைக் காரணம் ஜார்க்கண்டு மாநில அரசின் மனித உரிமை மீறல்களை பாப்புலர் ஃப்ரண்ட் ஆஃப் இந்தியா அமைப்பு உறுதியாக எதிர்த்து வருவதே ஆகும். காவல்துறை நடத்தும் சட்ட விரோதக் கொலைகளும், இந்துத்துவ ஆற்றல்கள் வேண்டாதவர்களை அடித்துக் கொலை செய்வதும், மாற்றார் மீது வெறுப்புமிழ்ந்து பேசுவதுமான குற்றங்களை எதிர்த்து பாப்புலர் ஃப்ரண்ட் ஆஃப் இந்தியா என்ற அமைப்பு சட்ட வழியிலும் ஜனநாயக வழியிலும் தொடர்ந்து உறுதியாக இயங்கி வருவதால் மாநில இந்துத்துவ ஆற்றல்களும் அரசும் எரிச்சலடைந்ததன் விளைவுதான் இந்தத் தடை.

ஜார்கண்டு மாநிலத்தில் தன் மீது விதித்துள்ள தடை நியாயமற்றது என்று பாப்புலர் ஃப்ரண்ட் கருதிய போதிலும், தடையை மதித்து அம்மாநிலத்தில் தன் செயல்பாட்டை நிறுத்திக் கொண்டு விட்டது. ஆனால் அதற்குப் பிறகும் மாநில அரசும் காவல்துறையும் பாப்புலர் ஃப்ரண்ட் உறுப்பினர்களைக் கைது செய்து பொய் வழக்கில் சிக்க வைக்கும் வேலை நடப்பதாக அறிகிறோம்.

இந்திய அரசின் பொருளியல், அரசியல் நடவடிக்கைகள் போகும் திசையை உற்றுக் கவனிக்கும் போது ஜனநாயக உரிமைகளை வளர்ச்சித் திட்டங்களுக்குத் தடைகள் என்பது போல் இந்திய அரசும் பெரும்பாலான மாநில அரசுகளும் பார்த்து வருகின்றன. மக்கள் மீது சுமைகள் ஏற ஏற, அதற்கு மக்களின் எதிர்ப்பு வளர வளர, உண்மையாக மக்கள் பக்கம் நின்று அவர்களுக்காகக் குரல் கொடுக்கும் அமைப்புகளின் மீதான தடை உள்ளிட்ட அடக்குமுறைகள் தீவிரமடைகின்றன. ஆகவே, இன்று ஜார்க்கண்டில் பாப்புலர் ஃப்ரண்ட் அமைப்பின் மீது பாய்ந்துள்ள தடை நாளை எந்த மாநிலத்திலும் எந்த ஜனநாயக அமைப்பின் மீதும் பாயும் ஆபத்துள்ளது என்பதை அனைவரும் உணர்ந்து கொள்ள வேண்டும்.

ஜார்க்கண்டு மாநில அரசும் இந்திய அரசும் பாப்புலர் ஃப்ரண்ட் ஆஃப் இந்தியா மீதான தடையை உடனே விலக்கிக் கொள்ளுமாறும், அவ்வியக்கத்தவர் மீதான பொய் வழக்குகளை விலக்கிக் கொண்டு, சிறையிலிருப்பவர்களை உடனே விடுதலை செய்யுமாறும் வலியுறுத்திக் கேட்டுக் கொள்கிறோம் என்று இந்த ஆலோசனைக்கூட்டத்தில் முடிவு செய்யப்பட்டது.

மேலும் இந்த இந்த தடையை திரும்பபெற வலியுறுத்தி எதிர்வரும் மார்ச் 16-ஆம் தேதி வெள்ளிக்கிழமை மாலை 03 மணியளவில் சென்னையில் தமிழகத்தின் இடதுசாரிகள் மற்றும் மதசார்பற்ற ஜனநாயக அரசியல் கட்சிகள், இயக்கங்களின் தலைவர்கள் ஒருங்கிணைந்து மாபெரும் கண்டன ஆர்ப்பாட்டம் நடத்துவது என தீர்மானிக்கப்பட்டது.

இந்த கூட்டத்தில் விடுதலை சிறுத்தைகள் கட்சி தலைவர் தொல்.திருமாவளவன், தமிழக வாழ்வுரிமை கட்சியின் தலைவர் வேல்முருகன், நாம் தமிழர் கட்சியின் ஒருங்கிணைப்பாளர் சீமான், தமிழ்நாடு காங்கிரஸ் கமிட்டி துணைத்தலைவர் தாமோதரன், மார்க்சிஸ்ட் கம்யூனிஸ்ட் கட்சியின் மாநில குழு உறுப்பினர் பாக்கியம், இந்திய கம்யூனிஸ்ட் கட்சியின் டாக்டர். ரவீந்திரநாத், மனித நேய மக்கள் கட்சியின் தலைவர் பேராசிரியர் ஜவாஹிருல்லாஹ், பாப்புலர் ஃப்ரண்ட் மாநில தலைவர் எம். முஹம்மது இஸ்மாயில், மே.17 இயக்கத்தின் ஒருங்கிணைப்பாளர் தோழர் திருமுருகன், தமிழ்தேசிய விடுதலை இயக்கத்தின் தலைவர் தோழர் தியாகு, PUCL தேசிய குழு உறுப்பினர் டி.எஸ்.எஸ்.மணி, கிருஸ்தவ நல்லெண்ண இயக்கத்தின் பிரதிநிதி ஜெயக்குமார், தமிழ்நாடு பெண்கள் கூட்டமைப்பு பிரதிநிதி ஃபாத்திமா முஸாஃபர், தேசிய லீக் கட்சி மாநில தலைவர் எம். பஷீர் அஹமது, தமிழ்நாடு விவசாயிகள் சங்கங்களின் கூட்டமைப்பு செயலாளர் நல்லபிமி, இந்திய தவ்ஹீத் ஜமாத் துணைத்தலைவர் முஹம்மது முனீர், இந்திய தேசிய லீக் பொதுச்செயலாளர் நிஜாமுதீன், வெல்ஃபேர் பார்ட்டி ஆஃப் இந்தியாவின் மாநில தலைவர் எஸ்.என்.சிக்கந்தர், இளந்தமிழகம் இயக்கத்தின் ஒருங்கிணைப்பாளர் செந்தில் குமார், CPML மக்கள் விடுதலை சதீஸ்குமார், இந்திய குடியரசு கட்சி மாநில ஒருங்கிணைப்பாளர் அன்பு வேந்தன், ஆல் இந்தியா மில்லி கவுன்சில் துணைத்தலைவர் இப்னு சவூத், தமிழ்நாடு முஸ்லிம் தொண்டு இயக்கத்தின் பொதுச்செயலாளர் சே.மு.மு.முஹம்மது அலி, தமிழக மக்கள் ஜனநாயக கட்சி யூசுஃப் கான், ஜமாத்தே இஸ்லாமிக் ஹிந்த் ஜலாலுதீன், ஆல் இந்தியா இமாம்ஸ் கவுன்சில் மாநில தலைவர் ஆபிருதீன் மன்பஈ, தமிழர் தொழில் வணிக வேலாண் பெருமன்ற பொருளாளர் பிச்சை முத்து, அகில இந்திய கிருஸ்தவ நீதிக்கட்சி கே.எஸ்.பாஸ்கரன், ஜமாத்தே உலாமே ஹிந்த் மன்சூர் காஷிஃபி, சமுதாய ஒருங்கிணைப்பாளர் முஹம்மது ஹனீஃபா, மக்கள் கண்காணிப்பகம் ஒருங்கிணைப்பாளர் ஆசிர்வாதம், அகில இந்திய தேசிய லீக் கட்சியின் இனாயத்துலாஹ், தமிழர் விடுதலை கழகம் சுந்தர மூர்த்தி, விடுதலை தமிழ் புலிகள் கட்சி வினோத் குமார், எஸ்.டி.பி.ஐ. கட்சி மாநில செயலாளர்கள் உமர் பாரூக், அமீர் ஹம்ஸா, ரத்தினம், மாநில பொருளாளர் முகைதீன், மாநில செயற்குழு உறுப்பினர்கள் ஏ.கே.கரீம், முஹம்மது ஃபாரூக், பாப்புலர் ஃப்ரண்ட் ஆஃப் இந்தியா மாநில துணைத்தலைவர் முஹம்மது ஷேக் அன்சாரி ஆகியோர் இந்த ஆலோசனைக்கூட்டத்தில் கலந்து கொண்டனர்.

இந்நிகழ்வில் கலந்து கொண்ட அனைத்து கட்சி தலைவர்களின் கையொப்பமிட்ட கூட்டறிக்கை வெளியிடப்பட்டது.

 

ஜார்கண்ட் மாநில பா.ஜ.க அரசை கண்டித்தும், பாப்புலர் ஃப்ரண்ட் மீதான தடையை திரும்ப பெற வலியுறுத்தியும் சென்னையில் பாப்புலர் ஃப்ரண்ட் ஆஃப் இந்தியா நடத்திய மாபெரும் கண்டன ஆர்ப்பாட்டத்தில் எஸ்.டி.பி.ஐ. கட்சியின் மாநில தலைவர் கே.கே.எஸ்.எம்.தெஹ்லான் பாகவி கலந்து கொண்டு கண்டன உரையாற்றினார்.

ஜார்க்கண்ட் மாநிலத்தில் பாப்புலர் ஃப்ரண்ட் ஆஃப் இந்தியா தடை செய்யப்பட்டிருப்பதற்கு எஸ்.டி.பி.ஐ. கட்சி கடும் கண்டனம் தெரிவித்துள்ளது

முத்தலாக் சட்ட மசோதா அரசியல் சட்டத்துக்கு எதிரானது!
முஸ்லிம் பெண்கள் நலனுக்கு முற்றிலும் புறம்பானது! - விமன் இந்தியா மூவ்மெண்ட் கண்டனம்!

தமிழை ஆண்டாள்’ என்ற தலைப்பில் ஆண்டாள் பற்றி கவிஞர் வைரமுத்து தெரிவித்த கருத்துகளுக்கு பதிலளிக்கும் வகையில், தனது வழக்கமான அநாகரிக போக்கை கையாண்டுள்ள பாஜக தேசிய செயலாளர் எச்.ராஜா, முஸ்லிம்கள் உயிரினும் மேலாக மதிக்கக் கூடிய இறைத்தூதர் முகமது நபி (ஸல்) பற்றியும் தேவையில்லாமல் பேசி, அந்த விவகாரத்தை சமூகங்களுக்கிடையிலான ஒற்றுமைக்கு பங்கம் விளைவிக்கும் வகையில் பேசியதை SDPI கட்சி வன்மையாக கண்டித்துள்ளது.

எஸ்.டி.பி.ஐ கட்சியின் மாநில தலைவர் கே.கே.எஸ்.எம்.தெஹ்லான் பாகவி இன்று(டிச.28) வெளியிடும் அறிக்கையில் கூறியிருப்பதாவது;

முத்தலாக் மூலம் விவாகரத்து செய்யக்கூடிய முஸ்லிம்களை தண்டிப்பதற்கான ஒரு மசோதாவை பாராளுமன்ற கூட்டத் தொடரில் நிறைவேற்றுவதற்கு மத்திய அரசு திட்டமிட்டு இருக்கிறது. முத்தலாக் சொல்லி விட்டால் விவாகரத்து நடைபெறாது, அது சட்டத்திற்கு எதிரானது என்று உச்ச நீதிமன்றம் தீர்ப்பளித்துள்ள நிலையில் முத்தலாக் சொன்னவர்களை தண்டிக்கிற சட்டம் என்பது தேவையில்லாதது. மத்திய அரசு முத்தலாக்கிற்கு எதிரான சட்டத்தை கொண்டு வருகிற முயற்சியை எஸ்.டி.பி.ஐ. கட்சி வன்மையாக கண்டிக்கிறது.

எஸ்.டி.பி.ஐ. கட்சியின் மாநில துறை சார்ந்த நிர்வாகிகள் கூட்டம் இன்று(டிச.26) நெல்லையில் எஸ்.டி.பி.ஐ கட்சியின் மாநில தலைவர் கே.கே.எஸ்.எம்.தெஹ்லான் பாகவி தலைமையில் நடைபெற்றது.

இதனிடையே பத்திரிக்கையாளர்களை சந்தித்த எஸ்.டி.பி.ஐ கட்சியின் மாநில தலைவர் கே.கே.எஸ்.எம்.தெஹ்லான் பாகவி கூறுகையில்;

முஸ்லிம்களின் முத்தலாக் விவகாரம் தொடர்பான மத்திய அரசின் முடிவை எஸ்.டி.பி.ஐ. வன்மையாக கண்டிக்கிறது;
முத்தலாக் மூலம் விவாகரத்து செய்யக்கூடிய முஸ்லிம்களை தண்டிப்பதற்கான ஒரு மசோதாவை பாராளுமன்ற கூட்டத் தொடரில் நிறைவேற்றுவதற்கு மத்திய அரசு திட்டமிட்டு இருக்கிறது. முத்தலாக் சொல்லி விட்டால் விவாகரத்து நடைபெறாது, அது சட்டத்திற்கு எதிரானது என்று உச்ச நீதிமன்றம் தீர்ப்பளித்துள்ள நிலையில் முத்தலாக் சொன்னவர்களை தண்டிக்கிற சட்டம் என்பது தேவையில்லாதது. மத்திய அரசு முத்தலாக்கிற்கு எதிரான சட்டத்தை கொண்டு வருகிற முயற்சியை நாங்கள் வன்மையாக கண்டிக்கிறோம்.

இந்த சட்டம் என்பது பெண்களுக்கு எதிரான கொடுமைகளை தடுப்பதற்காக கொண்டு வரப்படுகிற சட்டம் என்று மோடி அரசு கூறினாலும், எதார்த்தத்தில் முஸ்லிம்களுக்கு எதிரான பாஜக அரசு எடுக்கும் நடவடிக்கையின் ஒரு பகுதியாகவே இந்த சட்டம் பார்க்கப்படுகிறது. இந்த சட்டம் முஸ்லிம்களின் தனியார் சட்டத்தை அவமதிப்பதற்கும், அந்த சட்டத்தை குறித்த தவறான அபிப்பிராயத்தை உருவாக்குவதற்காகவே மத்திய அரசு இச்சட்டத்தை கொண்டுவர முயலுகிறது. எனவே, எந்த தேவையும் இல்லாமல் இச்சட்டத்தை கொண்டு வரும் இம்முயற்சியினை மோடி அரசு கைவிட வேண்டும். அதையும் மீறி மோடி அரசு இச்சட்டத்தை கொண்டுவர முற்பட்டால் முஸ்லிம்களும், எஸ்.டி.பி.ஐ. கட்சியும் ஒருங்கிணைந்து மிகப்பெரிய போராட்டத்தை முன்னெடுக்கும்.

நாடு முழுவதும் வாழும் முஸ்லிம் அறிஞர்களும், இஸ்லாமிய அமைப்புகளும், அரசியல் கட்சிகளும் முஸ்லிம்களின் விவகாரங்களில் முஸ்லிம்களின் ஒட்டுமொத்த பிரதிநிதியாக செயல்படுகிற முஸ்லிம் தனியார் சட்ட வாரியமும் மத்திய கொண்டு வரும் இச்சட்டத்தை கடுமையாக எதிர்க்கிறது. எனவே, மத்திய அரசு ஒட்டுமொத்த முஸ்லிம்களின் உணர்வுகளுக்கு மதிப்பளித்தும், கோரிக்கைகளுக்கு செவி சாய்த்தும் சட்டத்தை கொண்டு வரும் முயற்சியை உடனடியாக திரும்ப பெற வேண்டும் என கேட்டுக் கொள்கிறேன்.


வாக்குக்கு பணம் கொடுப்பது என்பது ஜனநாயகத்தின் மாண்பை குழிதோண்டி புதைக்கக்கூடிய செயலாகும்;

தமிழ்நாட்டில் நடைபெறுகிற பொதுத் தேர்தல்களாக இருந்தாலும், இடைத்தேர்தல்களாக இருந்தாலும் வாக்குக்கு பணம் பட்டுவாடா செய்யப்படுகிறது என்கிற குற்றச்சாட்டு அதிகமாகவே முன்வைக்கப்படுகிறது. வாக்குக்கு பணம் கொடுப்பது என்பதில் இந்தியாவிலேயே தமிழகம் முன்னிலையில் இருக்கிறது என்கிற கருத்து அதிகமாக முன் வைக்கப்படுகிறது. எந்த கட்சி வாக்குக்கு பணம் கொடுத்தாலும், அது கண்டிக்கத்தக்கதே. இந்த கட்சிதான் கொடுத்தது, அந்த கட்சி கொடுத்தது என்பதைத் தாண்டி தமிழக அரசியலில் இருக்கிற முக்கிய அரசியல் கட்சிகள் வாக்குக்கு கடந்த காலங்களில் பணம் கொடுத்ததாகவே குற்றம் சாட்டப்படுகிறது. வாக்குக்கு பணம் கொடுப்பது என்பது ஜனநாயகத்தின் மாண்பை குழிதோண்டி புதைக்கக்கூடியது. எனவே வாக்குக்கு பணம் கொடுப்பது என்கிற இந்த சீர்கேட்டை, ஜனநாயகத்தை அழிக்கக்கூடிய இந்த அழிவு சக்தியை, இல்லாமல் ஆக்க வேண்டிய பொறுப்பு, ஜனநாயகத்தை பாதுகாக்க வேண்டிய பொறுப்பு, அனைத்து அரசியல் கட்சிகளுக்கும் இருக்கிறது, அதனுடைய தலைவர்களுக்கும் இருக்கிறது. எனவே வரும் காலங்களில் நடைபெறவிருக்கிற தேர்தல்களில் வாக்குக்கு பணம் கொடுப்பதை தடுத்து நிறுத்த வேண்டும். அதை அனுமதிக்கக்கூடாது. நாம் சார்ந்திருக்கிற கட்சி பணம் கொடுக்காது என்கிற நிலையை உருவாக்குவதற்கு அனைத்து கட்சி தலைவர்களும், நிர்வாகிகளும் முன்வர வேண்டும் என்று எஸ்.டி.பி.ஐ கட்சியின் சார்பாக கேட்டுக்கொள்கிறேன்.

ஆர்.கே. நகர் இடைத்தேர்தலில் வெற்றி பெற்ற தினகரன் அவர்களுக்கு எஸ்.டி.பி.ஐ கட்சியின் வாழ்த்துக்களை தெரிவித்துக்கொள்கிறோம்;

ஆர்.கே.நகர் இடைத்தேர்தலில் பிளவுபட்டு நிற்கும் அ.இ.அ.தி.மு.க,வில் யார் மக்களுடைய அங்கீகாரத்திற்குரியவர் என்பதே மிக முக்கியமான விவாதமாக மாறிப்போன காரணத்தினால் தி.மு.க இந்த தேர்தலில் பின்னுக்கு தள்ளப்பட்டதாக நான் கருதுகிறேன். அ.தி.மு.க,வை உடைக்க வேண்டும் என்கிற பா.ஜ.க,வின் சூழ்ச்சிக்கு ஈ.பி.எஸ்-ஓ.பி.எஸ் அணியினர் உடன்பட்டு ஒத்துழைப்பு நல்குகிறார்கள் என்கிற எண்ணம் மக்களுக்கு வந்து விட்டது. எனவே அ.தி.மு.கவில் பா.ஜ.கவின் தலையீட்டை விரும்பாத மக்கள் தினகரனுக்கு பெருவாரியாக வாக்களித்து இருக்கிறார்கள். இதை புரிந்துகொண்டு பா.ஜ.க.வோடு இருக்கும் உறவை அ.தி.மு.க.வின் ஈ.பி.எஸ்-ஓ.பி.எஸ் அணியினர் உடனடியாக துண்டித்து தமிழகத்தின் உரிமையை பாதுகாக்கக்கூடிய விஷயங்களில் மத்திய அரசுக்கு எதிராக குரல் கொடுக்கிற நிலையில் தன்னை உருவாக்கிக்கொள்ள வேண்டும் என்பதோடு, தினகரனோடு இணைந்து அ.தி.மு.க.வை வலிமைப்படுத்துகிற முயற்சிகளை மேற்கொள்ள வேண்டும் என்று நான் கேட்டுக்கொள்கிறேன்.

 

       

பத்தாண்டுகள் கழித்த சிறைவாசிகளை கருணையின் அடிப்படையில் தமிழக அரசு விடுதலை செய்ய வேண்டும், இந்த கோரிக்கையை வலியுறுத்தி ஜன.06ந் தேதி கோவை மாபெரும் ஆர்ப்பாட்டம்;

பத்தாண்டுகள் சிறை தண்டனை கழிந்த ஆயுள் சிறை கைதிகளை விடுதலை செய்ய வேண்டும் என்று தொடர்ந்து வலியுறுத்தி வருகிறோம். ஆனால் தமிழக அரசு இந்த கோரிக்கையை தொடர்ந்து நிராகரித்து வருகிறது. ராஜீவ்காந்தி கொலை வழக்கில் கைது செய்யப்பட்டு, சிறையில் இருக்கும் ஏழு தமிழர்களை விடுதலை செய்ய வேண்டும் என்கிற சட்டமன்றத்தின் அந்த கோரிக்கையும் நிறைவேற்றப்படாமல், புறக்கணிக்கப்பட்ட நிலையிலேயே இருக்கிறது. கருணையின் அடிப்படையில் ஆயுள் சிறை கைதிகளை விடுதலை செய்வதற்கு பா.ஜ.க கடந்த காலங்களில் தனது எதிர்ப்பை பதிவு செய்திருக்கிறது. ஆனால், நேற்றைய தினம் வாஜ்பாயின் பிறந்த தினத்தை முன்னிட்டு உத்திரப்பிரதேசத்தில் 93 ஆயுள் சிறை கைதிகளை உத்திரபிரதேச பா.ஜ.க அரசு விடுதலை செய்திருக்கிறது என்பதை தமிழக அரசின் கவனத்திற்கு நாங்கள் கொண்டு வருகிறோம். எனவே, மத்திய பா.ஜ.க அரசு எதிர்ப்பு தெரிவிக்கும் என்பதை பற்றியெல்லாம் கவலைப்படாமல் தமிழகத்தில் இருக்கிற அனைத்து சமூகங்களை சேர்ந்த பத்தாண்டுகள் தண்டனை பெற்ற ஆயுள் சிறை கைதிகளை கருணையின் அடிப்படையில் விடுதலை செய்ய வேண்டும் என்று தமிழக அரசை வலியுறுத்தி கேட்டுக்கொள்கிறேன். அதோடு சிறைக்கைதிகள் சமீர், தப்ரூ மற்றும் SLE நோயினால் கடுமையாக பாதிக்கப்பட்ட அபுதாஹிர் ஆகியோரை விடுதலை செய்ய வேண்டும் என்று உயர் நீதிமன்றம் சமீபத்தில் உத்தரவிட்டு இருக்கிறது. இந்த இரண்டு பேரின் விடுதலை குறித்து பரிசீலிக்காமல் காலம் தாழ்த்தி வரும் தமிழக அரசை வன்மையாக கண்டிக்கிறோம். உயர் நீதிமன்றத்தின் உத்தரவின் அடிப்படையில் இருவரையும் விடுதலை செய்ய வேண்டும் என்ற கோரிக்கையை வலியுறுத்தி எதிர்வரும் 2018 ஜனவரி 06ந் தேதி கோவையில் எஸ்.டி.பி.ஐ கட்சியின் சார்பாக மாபெரும் ஆர்ப்பாட்டம் நடைபெறுகிறது என்பதை தெரிவித்துக்கொள்கிறேன்.

ஓகி புயலினால் பாதிக்கப்பட்ட மக்களுக்கு உரிய நிவாரணங்கள் உடனடியாக கிடைப்பதற்கு மத்திய, மாநில அரசுகள் உரிய நடவடிக்கை எடுக்க வேண்டும் என்று வலியுறுத்துகிறோம்;

உயிரிழந்தவர்களுக்கு தமிழக அரசு அறிவித்திருக்கிற ரூபாய் 20 லட்சத்தையும், காணாமல் போனவர்களையும் உயிரிழந்தவர்களாக கணக்கில் கொண்டு அவர்கள் குடும்பத்தினருக்கும் ரூபாய் 20 லட்சத்தையும் தமிழக அரசு உடனடியாக வழங்க வேண்டும் என கேட்டுக்கொள்கிறேன். ஓகி புயலால் பாதிக்கப்பட்ட விவசாயிகளுக்கு சேத மதிப்பீட்டை கணக்கிட்டு உடனடியாக அதற்குறிய நிவாரண தொகையினை வழங்க வேண்டும் என தமிழக அரசை நாங்கள் வலியுறுத்துகிறோம்.

நெல்லை மாவட்டத்தில் உள்ள சாலைகளை விரைந்து சீரமைக்க வேண்டும்;

நெல்லை மாவட்டத்தில் சாலைகள் போடப்பட்டு நீண்ட காலமாகியதாலும், மழையினாலும் மிகுந்த சேதமடைந்து இருக்கிறது. மக்கள் மிகப்பெரிய சிரமத்தை சந்தித்துக்கொண்டிருக்கிறார்கள். இது குறித்து பல்வேறு தரப்பினரும் மாவட்ட நிர்வாகத்திற்கு தொடர்ந்து கோரிக்கை வைத்தும் மாவட்ட நிர்வாகம் செவி சாய்க்காமல் இருப்பது கண்டிக்கத்தக்கது. உடனடியாக மாவட்ட நிர்வாகம் மாவட்டம் முழுவதும் உள்ள சாலைகளை சீர் செய்திட உரிய நடவடிக்கை எடுத்திட வேண்டும் எனவும் தமிழக அரசு அதற்கு ஆவண செய்திட வேண்டும் எனவும் கேட்டுக்கொள்கிறேன்.
இவ்வாறு அவர் கூறினார்.

இந்த பத்திரிக்கையாளர் சந்திப்பில் எஸ்.டி.பி.ஐ கட்சியின் மாநில பொதுச் செயலாளர் அப்துல் ஹமீது, மாநில துணை தலைவர் நெல்லை முபாரக், மாநில செயற்குழு உறுப்பினர்கள் ஜாபர் உஸ்மானி, அபுபக்கர் சித்திக், அபுதாஹிர், அஹமது நவவி, முஸ்தபா, ஃபாரூக், முஜீப் ரஹ்மான்,நெல்லை மாவட்ட பொதுச் செயலாளர் S.S.A.கனி ஆகியோர் உடனிருந்தனர்.

பசியிலிருந்து விடுதலை! பயத்திலிருந்து விடுதலை!!

செய்திகள்

கட்சி செய்திகள்

தேசிய செய்திகள்

மாநில செய்திகள்

மாவட்ட செய்திகள்

வர்த்தகர் செய்திகள்

வழக்கறிஞர் செய்திகள்

நிர்வாகிகள்

தேசிய நிர்வாகிகள்

மாநில நிர்வாகிகள்

மகளிர் நிர்வாகிகள்

மாவட்ட நிர்வாகிகள்

வர்த்தகர் நிர்வாகிகள்

வழக்கறிஞர் நிர்வாகிகள்

பொதுவானவை

புதிய பாதை

சுவரொட்டிகள்

எங்களைப் பற்றி

அமைப்புச் சட்டம்

கொள்கை விளக்கம்

பத்திரிக்கை அறிக்கை